Dalawang Uri ng Korapsyon at ang DepEd

“May mga tao talagang ganid at sakim. Kahit mali gagawin, kahit mabuti hindi gagawin.”

May dalawang uri ng korapsyon ayon sa aking kamag-aral sa isang pamantasan sa Quezon City. Ang isa ay tinatawag na “shared corruption” at ang isa naman ay “solo corruption”. Ang shared corruption ay ginagawa ng mga taong nasa senado at kongreso sa pamamagitan ng PDAF o mas kilala sa tawag na pork barrel. Gumagawa ng mga iskolarship pero dinadagdagan ang bilang ng mga iskolar o kaya naman ay dinadagdagan ang kanilang binibigay sa mga ito pero sa papel lang. Isa lamang yon sa maraming halimbawa. Kaya buti pa daw ang PDAF, atlis na ipamamahagi. Ngunit hindi ko sinasang-ayunan ang korapsyon. Sa kabilang banda, ang solo corruption ay ginagawa ng mga nasa departamento, ang halimbawa ay DPWH, DepEd, BIR, custom atbp. Ayon din sa naikwento sa akin mula sa isang nagtatrabaho sa “House of Representatives”, kapag nagpapagawa ng libro ang DepEd, sa isang milyong piso, 700K ang sa kalihim ng departamento. 300K lang ang napupunta sa libro. Kung totoo ito, mahiya-hiya naman sila. Kaya tinawag na solo corruption. Naaalala nyo ba ang mga tinaguriang “euro generals”, sila ang pinakamainam na halimbawa ng solo corruption. Sa kanila lang ang pera. Hindi naman sa gusto kong humingi sa kanila pero ang kakapal ng mukha nila! Kaya isipin din kung dapat bang idirekta ang PDAF sa mga departamento ng gobyerno.  

Nagpuyos ang aking damdamin kaya ko nagawang magsulat nito. Nais kong ipasiyasat sa Commission on Audit ang mga proyekto ng DepEd sa buong bansa. Nagtataka ba kayo kung bakit siksikan sa mga silid-aralan natin ngayon sa mga pampublikong paaralan? Bakit kaya kalimitan ay hanggang ikalawang baitang lamang ang mga gusaling ipinagagawa ng DepEd. Ito ay dahil takot silang kapag lumindol ay mabisto sila na “substandard” lang ang kanilang mga pinagagawang silid aralan. Kagagawa pa lang ng mga silid-aralan ay may malalaking crack na kaagad.

Alam nyo ba na target ng DepEd na magpatayo ng 90K na palikuran sa buong bansa? Kaya nga napakaraming CR na ginagawa sa mga paaralan ngayon. Tinutulungan sila ng lokal na pamahalaan sa pagpapatayo ng mga iyon. At alam nyo ba kung magkano ang halaga ng isang CR? Hindi pa ito kumpirmado pero ang balita ko sa isang padrino ng kontrata sa mga proyekto ay 600K ang isang gusali ng CR. Pwede ka nang magpagawa ng magandang bahay niyan! Muli kung tama ito ay ang kakapal ulit ng mga mukha ninyo! May kontraktor na, ipapa-subcon pa ulit sa subcon ng subcon ng subcon? E di tataas nga ang halaga ng mga proyekto. Nasaan ang pera? Sinolo ninyo! Commission on Audit, galaw-galaw din pag may time. Huwag magbulag-bulagan.